НОВИ САД – Вчера у Културним центре у Новим Садзе отримана конференция Орґанизацийного одбору за реализацию инициятиви же би Нови Сад 2021. року постал европска престолнїца култури. На тим сходзе представени и Нарис стратеґиї „Нови Сад 2021”, брендовски и визуелни идентитет того проєкту, а кандидатуру треба придац до конца идуцого рока.
Дотераз, як найвекши адути Нового Саду визначовани мултиетнїчносц и мултикултуралносц, як и новосадски фестивали, медзи хторима найпознатши Еґзит, хтори того року преглашени за найлєпши европски фестивал.
Титулу Европскей престолнїци култури ше додзелює од 1985. року, з цильом повязованя гражданох Европи и звекшаня свидомосц о заєднїцкей историї и вредносцох. Европску престолнїцу култури преглашує Совит Европскей униї, а город хтори достанє тоту титулу, на єден рок постава шедзиско вельких културних збуваньох.
Европска престолнїца култури од 2021. року годзен буц и город чия держава нє у Европскей униї. Нови Сад рихта кандидатуру, медзитим, дотераз роботи на тим проєкту були нєкоординовани пре нєпостоянє плану, односно Стратеґиї.