БЕОҐРАД – Без огляду же нови Закон о учебнїкох прилапени пред мешацом, нови школски кнїжки по тим законє у школох буду аж о три роки, оценюю видавателє учебнїкох. Видавателє обецую же ше ґу роботи по новей програми приступи озбильно. а за тот 1. септембер гвяря же шицко порихтане.
Кед 31. юлия прилапени нови Закон о учебнїкох, министер просвити обецал же учебнїки буду квалитетнєйши. З тим ше склада и предсидателька Здруженя видавательох учебнїкох Ґордана Кнежевич Орлич, алє надпомина же за тото потребни час и фундаментална робота.
– Шицко можеме обчековац о три роки. Було важне приношенє того закону, же би видавательом и автором обезпечел квалитетни час за квалитетну продукцию. Шицко цо швидке, нє добре – гварела предсидателька Здруженя Кнежевич Орлич.
И покля ше на нови учебнїки причека, видавателє закончую пририхтованя за тот школски рок, з обецунку же шицки учебнїки у школох и кнїжкарньох буду начас.
Цена комплету учебнїкох у тим школским року за нїзши класи и до 9 500 динари, а за висши аж и до 17 000, цо драге у одношеню на штредню плацу у Сербиї.