НОВИ САД – Скупштина Городу Нови Сад на вчерайшей схадзки прилапела Одлуку о максималним чишлє роботнїкох у новосадскей управи, хтора предвидзує же у 56-ох орґанизацийних єдинкох може буц найвецей 8 380 занятих.
Городоначалнїк Нового Саду Милош Вучевич гварел же 70 особи звишок, а нє правда же буду одпущени 600 особи, як писали медиї. Медзитим, нє винєсол податки о точним чишлє будуцих одпущених. Представителє опозициї критиковали одлуки прето же думаю же ше з нїма нє посцигнє ефект рационализованя управи.
Вучевич гварел же под час його мандату, од 2012. року, зменшане число занятих за 209 особи. Теди у явних подприємствох робели 5 750 особи и 1 209 у управи, а тераз у явних подприємствох єст 5 500, а у управи 1 120 занятих.