НОВИ САД – За основни и штреднї школи на териториї Нового Саду з Городского буджету за 2015. рок опредзелєни 420 милиони динари, цо 200 милиони вецей як дотераз, сообщел вчера член Городскей ради задлужени за образованє Владимир Єлич и наявел нови проєкти и инвестициї.
– Того року плануєме почац будовац музичну и балетску школу з концертну салу, велькосци коло 10 000 квадрати – гварел Єлич и додал же то будзе єдно з найвекших укладаньох того року. Окрем того, плановане и будованє физкултурней сали у Лединцох, заменїц азбестни закрица на школох, та предлужиц роботу на куполи на Змай Йововей ґимназиї.
У сообщеню у хторим винєсол плани Городу у обласци образованя, Єлич повинчовал и нєшкайше школске швето Святи Сава.