РУСКИ КЕРЕСТУР – Вчера, предостатнї вечар Драмского мемориялу Петра Ризнича Дядї, на камерней сцени (на бини Дому култури), Руски културни центер з Нового Саду одбавел представу „Божеска ноц”, по тексту Миру Ґаврана, а у адаптациї и режиї Звонимира Павловича.
Представа критика абсолутизму и тривиялного живота французкого краля Луя XIV, котри пре свой розкош и живот яки водзел наволани Краль Слунко. У єдним з друженьох и опиваньох, краль вимага же би му дворски дурнїло и писатель Молиєр виведли представу у хторей вишмеюю живот їх владара, так же „Божеска ноц” и представа у представи, хтора на концу указує як у тоталитарних режимох преходза критичаре власци.
У представи ґлумя Борис Фейди, Славко Бучко, Иґор Горняк, Любица Фечо и Александра Живкович, а награду публики за найлєпше одбавену улогу достал Иґор Горняк, котри ґлумел дворского Дурнїла.