КОЦУР – У етно-клубу „Одняте од забуца” у Коцуре всоботу вечар означена Ноц музейох, хтору Клуб пошвецел 190-рочнїци од наставаня прешей фотоґрафиї. З тей нагоди нащивителє того вечара могли опатриц виставу фотоґрафийох зоз прешлосци Коцура, автора Райка Шолаї.
Виставу отворела предсидателька Етно-клубу Аранка Медєши, читаюци биоґрафию Райка Шолаї, хтори, гоч є по походзеню нє зоз Коцура, през свою любов ґу фотоґрафиї за живота зазначел велї подїї зоз културного живота того места. Моника Гарди потим присутним пречитала кратки историят фотоґрафиї.
На вистави були виложени стари фотоґрафиї зоз манифестацийох „Коцурска жатва” осемдзешатих рокох, як и фотоґрафиї Ловарского дружтва „Сокол”. Райково фотоґрафиї Етно-клубу подаровала фамелия Шолайових, же би шведочели о дакедишнїм виптарунку валалу, як и о людзох хтори у нїм жили, а од хторих велї уж нє медзи нами.