Попри Шиду, каплїчки на теметове и у Ердевику, Адашевцох, Моровичу, Вашици, Ямени и Куковцох, а обчекує ше же нєодлуга у функциї будзе и каплїчка на православним и грекокатолїцким теметове у Бачинцох.
Пред двацец пейц роками принєшена одлука же би ше у Шидзе покойних ховало лєм зоз каплїчкох. Медзи иншим, ришени вельки проблем транспорту, котри у улїцох дзе бул вельки обток, правел застановки и колони превозки. Окреме у главней Улїци Цара Душана, котра водзи ґу гранїци з Републику Горватску.
Подобна ситуация була и у Улїци Цара Лазара кед хованя ишли на грекокатолїцки, римокатолїцки або словацки теметов, а шицки ше находза на окраїску городу у Улїци Дюри Киша.
Каплїца перше була збудована на городским теметове, а потим и на теметовох у Улїци Дюри Киша. Кед вибудована и друга каплїца, вец на подручю города запровадзена одлука же би труна з умартим мушела буц превежена до каплїци найменєй два годзини пред хованом.
У медзичаше, каплїци ше почали будовац и по валалох. Даєдни уж збудовани и роками су у функциї, даґдзе ше чека же би з нїх почали ховац, а єст и надосц валали у општини у хторих нєт каплїчки.
Попри Шиду, каплїчки на теметове и у Ердевику, Адашевцох, Моровичу, Вашици, Ямени и Куковцох, а обчекує ше же нєодлуго у функциї будзе и каплїца на православним и грекокатолїцким теметове у Бачинцох.
Як нам гварел Слободан Лазаров, предсидатель Совиту МЗ Бачинци, до каплїчки уведзена струя и вода, остало покончиц „дробнєйши” роботи у нукашньосци, а вец же би була технїчни препатрена и придата на хаснованє. У Бачинцох хованя преходза през главну улїцу, обтерховану зоз вельким тарнспортом, и вец приходзи до застановйованя.
Подобна ситуация и у Беркасове и Бикичу дзе тиж нєт каплїчки, а драга од Шиду водза ґу тим валалом и у напряме державней гранїци з Републику Горватску, та тиж обтерховюю транспорт.
– Хова ше зоз каплїчкох у Шидзе и валалох, дзе су збудовани, и то вшелїяк олєгчує випровадзованє на остатню драгу. Стараме ше о каплїчкох у Шидзе и тоту на городским теметове зме нєдавно обилєли, а плануєме купиц ище єдну превозку за транспорт покойних як и инсталовац хладзальню у каплїчки на городским теметове. Нажаль єст и вандалох хторима каплїчки як же „завадзаю”, та нє ридки крадзи цивох за одзеканє води, порозбивани скла, а окреме по тим питаню загрожена каплїчка на теметовох у Улїци Дюри Киша – гвари Виолета Цолнер, руководителька Роботней єдинки „Теметови” у ЯКП „Стандард”.