РУСКИ КЕРЕСТУР – У Здравственей амбуланти у Руским Керестуре нєшка, 19. новембра, од 8 до 12 годзин буду превентивни препатрунки за гражданох, ткв. Базар здравя.
Препатрунки безплатни и нє треба их заказовац, а з мотом „За напреднєйше здравє” орґанизує их Дом здравя Кула у шицких местох у кулскей општини.
Гражданє годни вимерац кревов прицисок, уровень цукру у креви (за цо би пред тим нє требало фриштиковац), окончиц консултативни препатрунок при кардиолоґови з ЕКҐ-ом, и ултразвук абдомену.
Як наглашую орґанизаторе, то идеална нагода и припаднїком младшей ґенерациї же би швидко, безплатно и без заказованя препатрела свойо основни здравствени параметри.
На ютре, 20. новембра, у Здравственей амбуланти у Керестуре будзе и акция добродзечного даваня креви, од 8 до 11 годзин, у орґанизациї Червеного крижу.