КУЛА – Нєшка, з початком на 10 годзин, у Велькей сали Скупштини општини (СО) Кула, будзе отримана штернаста схадзка локалного парламенту.
Пред одборнїками ше найду 15 точки дньового шору од хторих перша предкладанє Одлуки о вименкох и дополнєньох Одлуки о буджету Општини Кула за период од януара по юний 2020. рок, як и звит о окончованю Одлуки о буджету Општини Кула за исти период.
Потим предвидзене розпатранє предкладаня Одлуки о꞉ оцудзованю нєрухомосци зоз явней власносци Општини Кула, зменшаню єй вредносци, порушованю поступкох за оцудзованє нєрухомосци и розписованє явней оглашки.
Попри тим, на дньовим шоре будзе и предкладанє менох Кадровского плану Општинскей управи Кула, як и предкладанє Рочней програми защити, ушореня и хаснованя польопривредней жеми за територию општини Кула за 2020. рок.
Одборнїки буду розпатрац и Звит о роботи установох чий снователь Општина Кула за 2019. рок, медзи хторима и Дом култури Руски Керестур, а на дньовим шоре будзе бешеди и о предкладаню Ришеня о даваню согласносци на Програму роботи зоз финансийним планом за 2021. рок тих установох.
Пред одобрнїками ше найдзе и предкладанє Ришеня о даваню согласносци на вименки и дополнєня Програми дїлованя ЯКП „Пречистач Вербас-Кула” Вербас за 2020. рок и Ришенє о даваню согласносци за вименки и дополнєня Окремней програми за хаснованє средствох зоз буджету Општини Вербас и Кула ЯКП „Пречистач Вербас-Кула” Вербас за 2020. рок.
Будзе дати и предклад Ришеня о розришованю и менованю членох школских одборох, и предсидательох и членох Надпатраюцого одбору ЯКП чий снователь Општина Кула.