Нєшка буду представени руски кнїжки на Сайме

автор М. Шанта
464 Опатрене

НОВИ САД – У сали „Борислав Пекич” на штанду Покраїнского секретарияту за културу, явне информованє и одношеня з вирскима заєднїцами на медзинародним сайме кнїжкох у Беоґрадзе НВУ „Руске слово” и Завод за културу войводянских Руснацох представя кнїжки на руским язику.

НВУ „Руске слово” на 12 годзин представи свою нову продукцию, як и даєдни кнїжки хтори обявени влонї – кнїжка поезиї Славка Романа Ронду „Одняти од псох”; вибрани огляди и портрети „Руснаци” (том II) Дюру Латяка; писнї за дзеци Ирини Гарди Ковачевич „За главки у лавки”; писнї и приповедки за дзеци Силвестера Д. Макая „Боси по праху”; поуки за дзеци и старших Юлияна Тамаша „Їжик голик” и зборнїк литератури младих 2010-2020 „Дзеци з дружтвених мрежох”. Кнїжки хтори обявени влонї, а нє представени су потераз на Сайме то драми Звонимира Павловича „Зазбероваче труплох” и кнїжка интервюох Олени Планчак Сакач „Вецей од бешеди”.

О кнїжкох буду бешедовац редакторе и рецензенти, а шицки котри нєшка буду на Сайму поволани нащивиц и тот штанд.

На Сайму ше на 13 годзин представи и Завод за културу войводянских Руснацох зоз виданями „Руснаци од присоєдинєня по Просвиту” автора др Дюру Гардия и „Зборнїк роботох зоз 4. Науковей конференциї младих науковцох и фаховцох” о котрим будзе бешедовац Саша Сабадош, єден з редакторох.

ПОВЯЗАНИ ТЕКСТИ