Нєшка Вельки пияток по григориянским календаре

автор мст/маф
1k Опатрене

РУСКИ КЕРЕСТУР – Нєшка Вельки пияток, дзень кед Исус Христос умар на крижу, и у керестурскей церкви св о. Миколая Вечурня з покладаньом плащанїци до гробу будзе на 15 годзин, хтору вирни годни циловац до соботи вечара. Пред тим, Утриня з читаньом 12 Страсних Євангелийох на 8 годзин, а нєшка и строги пост. Нєшкайши богослуженя будзе служицц владика Георгий и домашнї священїки.

Пред Страсним тижньом, парох керестурски о. Михайло Малацко замодлєл родичох, младих и дзеци же би нащивели Исусов гроб и на таки способ висловели сочувствиє и солидарносц з розпятим Исусом. На Вельки пияток почина и Дзевятинїца до Божого милосердия.

З богослуженями у катедралним храме св. о. Миколая вчера вечар означени Вельки -Желєни штварток. Василийову Службу Божу предводзел преосвящени владика Георгий Джуджар, а сослужели домашнї священїки – парох о.Михайло Малцко и капелан о. Владимир Медєши.

Як спомин на конкретни и символични чин на Исусово умиванє ногох апостолом, владика на концу богослуженя умил ноги 12 членом Церковного одбору керестурскей церкви.

 

ПОВЯЗАНИ ТЕКСТИ