БЕОҐРАД – У Беоґрадзе нєшка буду отримани два сходи пошвецени националним меншином у Сербиї, на хторих буду присуствовац и представителє Националного совиту (НС) Руснацох.
На округлим столє проєкту „Minority News” („Меншински висти”) з тему „Робота на приношеню нового Закона о националних совитох националних меншинох: Можлїви ришеня”, будзе присуствовац заменїк предсидателя НС Руснацох Йовґен Мудри.
На округлим столє з тему „Принципи политики интеґрациї националних меншинох у Републики Сербиї”, хтори орґанизує Форум за етнїчни одношеня, будзе присуствовац предсидатель Вивершного одбору НС Руснацох Желько Ковач.
Як наявене, попри представительох националних совитох меншинох, на обидвох сходох буду присуствовац и представителє Влади Републики Сербиї, односно ресорних министерствох.