Нєшка дефиле Ґарди, на ютре приказ способносцох Войска Сербиї

автор зам  фото вев
1.1k Опатрене

НОВИ САД – З нагоди 23. октобра, Дня ошлєбодзеня Нового Саду у Другей шветовей войни, на ютре, 22. октобра, у Новим Садзе будзе отримани приказ роботи, опреми и специялносцох припаднїкох Министерства одбрани и Войска Сербиї, а нєшка дефиле и еґзерцир Ґарди.

На ютрейшей шветочносци участвую коло 700 припаднїки Войска Сербиї у статичним и динамичним приказу, а будзе представене и нове наоружанє и воєна опрема – сообщело Министерство одбрани.

На тим приказу часци оперативних способносцох участвую припаднїки Специялней бриґади, Ричней флотили, Воєного воздухоплївства и Процивоздушней одбрани, Ґарди и других єдинкох Войска Сербиї. У статичней часци буду приказани 40 средства, а 32 у моторизованим ешалону. Тиж участвую и 20 плївни обєкти Ричней флотили и 20 лєтадла Войска Сербиї.

Ютрейшиа приказ у Новим Садзе будзе на Беоґрадским кею на 12 годзин.

Нєшка, пияток, на 16 годзин будзе променадни дефиле Ґарди – од Команди 1. бриґади Пехотного войска у Дунайскей улїци, та по Площу шлєбоди, дзе при памятнїку Светозарови Милетичови будзе еґзерцир Ґарди и приказ борбох Специялней бриґади.

Пре нєшкайши и ютрейши збуваня, у городзе будзе вименєни режим транспорту.

ПОВЯЗАНИ ТЕКСТИ