СЕРБИЯ – Православна церква нєшка означує швето Святого Трифуна, а католїцка Святого Валентина, цо источашнє и Дзень залюбених. Обидвоме святи жили у трецим вику и умарли з мученїцку шмерцу за виру.
Трифун мал способносц лїчиц людзох од рижних хоротох и помагал худобним. Православна церква го слави як велькомученїка котри страдал за виру, нє виключиюци його значенє як защитнїка малженскей любови и вирносци, а нєшка є найпознатши як защитнїк винїцарства и вина, так же то и слава винїцарох.
Дзень святого Валентина ше означує ище з часу старого Риму, а на нєшкайши датум, 14. фебруара, по розказу цара Клаудия Другого Валентинови одрубали главу прето же потайнє винчал млади залюбени пари, насампредз воякох з їх вибранима, цо Клаудиє забранєл, бо у войску нє сцел оженєтих воякох. Православна церква тиж означує Святого Валентина, алє 12. авґуста.
Народ Валентина пошвидко преглашел за святого, а Валентиново, як сакрални Дзень залюбених, першираз ше з романтичну любову почало вязац у штреднїм вику.