СЕРБИЯ/ШВЕТ – На нєшкайши дзень 1945. року нацистична Нємецка подписала безусловну капитулацию, з чим формално закончена Друга шветова война, так же ше ширцом швета 9. май слави як Дзень побиди над фашизмом.
Як и у других державох, Дзень побиди над фашизмом ше з кладзеньом венцох на памятнїки погинутих борцох и пригоднима програмами нєшка означує и у Сербиї.
Оценєте же у Другей шветовей войни погинули 50 милиони людзе. Документ о капитулациї у Берлинє подписали нємецки фелдмаршал Кайтел, а у мено Антифашистичней коалициї, капитулациї шведочели совєтски маршал Жуков и британски ґенерал Тедер.
Друга шветова война 9. мая закончена у цалей Европи, окрем у тедишнєй Югославиї, у хторей тирвала по 15. май. Без огляду на тото, и у Сербиї ше 9. май означує як Дзень побиди и нєшка державне швето, алє як роботни дзень.
Нєшка, 9. мая и Дзень Европи, як здогадованє на датум кед 1950. року тедишнї французки министер Роберт Шуман виложел концепт зєдинєного континенту, цо постала основа за познєйше снованє нєшкайшей Европскей униї (ЕУ).
Як сообщел ЕУ инфо-центер, у нашей жеми з тей нагоди почнє и „Мешац Европи”, у рамикох хторого буду орґанизовани вецей як 20 збуваня, а сам Дзень Европи будзе означени з численима активносцами у Беоґрадузе и ширцом Сербиї.
У сообщеню ше наводзи и же ЕУ проєкт Европи принєсол до теди найвисши уровень мира и просперитету.