РУСКИ КЕРЕСТУР – Основна о штредня школа з домом школярох „Петро Кузмяк” нєшка, 25. мая, з културно-уметнїцку програму означи свой Дзень. Програма будзе у Велькей сали Дому култури на 18 годзин.
Програму з нагоди Дня школи пририхтую школяре зоз своїма наставнїками, а буду визначени и посцигнуца школярох з обидвох школох у тим школским року, як и звит о вонкашнїм оценьованю квалитету роботи Школи, хторе окончене у марцу. Тих дньох сцигла и оцена хтору Школа достала на тим оценьованю – „моцна тройка” з найвекшей можлївей „штверки”.
Як дознава Рутенпрес, попри школярох, родичох и шицких жительох Керестура, на означованє Дня школи поволани и велї госци зоз шицких уровньох власци, з руских институцийох, як и представителє руских и других школох з хторима керестурска сотрудзує.