Нєшка и ютре на „Петровским дзвонє”

автор зам
934 Опатрене

ПЕТРОВЦИ – На 42. Манифестациї култури Руснацох у Горватскей „Петровски дзвон”, хтора почала вчера, нєшка на 18 годзин будзе фодбалске змаганє ветеранох ФК „Петровци” и ФК „Русин” з Руского Керестура, на 18,30 г. отверанє виставох у Етноґрафскей збирки, на 19 г. промоция кнїжкох, а на 20 г. Музично-литературни вечар.

У Етноґрафскей збирки будзе отворена вистава малюнкох младих авторох родом з Петровцох – Кристияна Медєша, Лариси Гнатко и Роберта Ерделя, як и вистава фотоґрафийох з нагоди 65-рочнїци КУД „Яким Гарди” з Петровцох.

На „Петровским дзвонє” нєшка буду представени кнїжки „Дом у шерцу” авторох Меланиї Пап и Звонка Барну з Вуковару; „Душа як гушля” Владимира Провчия з Матульох коло Риєки и зборнїку „Думки з Дунаю” вецей авторох.

На Музично-литературним вечаре участвую писателє-Руснаци з Горватскей, а вчера пошвецени означованю 85 рокох народзеня Силву Ерделя, 85 рокох народзеня Владимира Костелника, 85 рокох народзеня Йозафата Колбаса и 65-рочнїци КУД „Яким Гарди” з Петровцох.

У музичней часци Вечара участвую члени спомнутого домашнього КУД, як и ансамбл „Кичера” з Медзилаборцох, зоз Словацкей.

На ютре, на нєдзелю, после кладзеня венцох на памятнїк на 9,30 и Служби Божей у петровскей церкви на 10 годзин, на 11 годзин почнє смотра музично-фолклорней творчосци дзецох „Петровски дзвончок”. Участвую дзецински ансамбли з руских местох у Горватскей, як и мадярски ансамбл з Ласлова.

Главна манифестация – „Петровски дзвон 2015” – ютре почнє на 15 г., а участвую танєчни ансамбли Руснацох у Горватскей, ансамбли других народох и националних меншинох у Горватскей, та госци з иножемства – „Кичера” з Медзилаборцох, зоз Словацкей и КПД „Дюра Киш” зоз Шиду, зоз Сербиї.

„Петровски дзон” на ютре будзе закончени з цаловечаршим концертом ансамблу КУД „Лєсаре” з Винковцох”.

 

ПОВЯЗАНИ ТЕКСТИ