Нєшка и ютре Шветови Конґрес РРЛ и Шветови Форум русинскей младежи

автор зам
1k Опатрене

ДЕВА (РУМУНИЯ) – У Деви, у Румуниї, нєшка почина Тринасти Шветови конґрес Руснацох/Русинох/Лемкох (ШК РРЛ), хтори тирва и на ютре, а нєшка пополадню у Деви будзе отримани и Седми Шветови форум русинскей младежи. На обидвох сходох участвую делеґати и госци зоз жемох-членїцох Конґресу и Форуму з Европи и Сиверней Америки.

Руску матку Сербиї на ШК РРЛ представяю 10 делеґати – Дюра Папуґа, Сенка Мученски, Миломир Шайтош, Юлиян Лазор, Владимир Бучко, др Михайло Фейса, Наташа Макаї Мудрох, Моника Гарди, Мария Дорошки и Владо Джуня. Як госци предсидателя Шветовей ради (ШР) РРЛ Дюру Папуґу з нашей жеми на Конґресу присуствую Владо Няради и Саня Тиркайло. Як госци предсидателя ШР поволани и дзепоєдни члени Парламетну Европи, та парламентох у жемох з хторих членїци Конґресу.

Форум младих Рускей матки на Шветовим форуме русинскей младежи представяю Борис Фейди, Ирена Скубан, Себастиян Няради, Татяна Шайтош и Стеван Самочета.

ШК нєшка почина на 10 г. з привитнима словами и пригодну програму домашнїх – Културного здруженя Русинох Румуниї, представительох державних орґанох Румуниї, а будзе уручена и тогорочна Награда ШР з меном „Василь Турок Гетеш”, хтору достанє Иван Чижмар зоз Свиднїку, зоз Словацкей.

Попри у пленуме, Конґрес будзе робиц и у шейсц комисийох, а спред РМ у Комисию за просвиту будзе Сенка Мученски, у Комисиї за културу Миломир Шайтош, у Комисиї информованє и видавательну дїялносц Саня Тиркайло, у Комисиї за медзисобне сотруднїцтво и туристични розвой Юлиян Лазор, у Комисиї за историю Русинох др Михайло Фейса и у Комисиї за Стату ШК Дюра Папуґа.

На другим пленарним зашеданю, на ютре, 20. юния, ШК на дворочни мандат вибере и нових членох Шветовей ради РРЛ, а Рада предсидателя и двох подпредсидательох.

 У рамикох Конґресу нєшка на вечар будзе Стретнуце русинских поетох и писательох будзе, на хторим з нашей жеми участвую Саня Тиркайло зоз Шиду и Себастиян Няради з Руского Керестура.

 

ПОВЯЗАНИ ТЕКСТИ