БЕРКАСОВО/ҐОСПОДЇНЦИ/КУЛА/РУСКИ КЕРЕСТУР – Нєшка, 21. новембра, на швето Собору Архангела Михаила по юлиянским календаре, у Беркасове храмове швето – Кирбай. Шветочна Служба Божа будзе на 11 годзин, а обчекує ше приход священїкох и вирних и з других наших парохийох.
Архангелови Михаилови пошвецена и наша церква у Ґосподїнцох, так же Шветочна кирбайска Служба у Ґосподнїцох нєшка будзе на 11 годзин.
На нєшкайши швета шицким особом котрим мено Михаил, Михаела, Михайло – имени дзень.
У грекокатолїцкей парохиї у Кули Кирбай на ютре, понеже ше швето св. Йосафата (25. новембра по юлиянским календаре) преноши на нєдзєлю, 22. новембра.
У Кули нєшка на вечар будзе Всеночне, а на ютре на 10 годзин будзе Архиєрейска Служба Божа, понеже ю будзе предводзиц наш преосвящени владика Георгий.
У парохиї св. оца Миколая у Руским Керестуре по григориянским календаре нєшка швето Воведениє Пресвятей Богородици. З тим шветом ше означує подїя зоз живота преч. Дїви Мариї, кед по єврейским обичаю як мале дзивче була одведзена до храму. Шицким Марийом нєшка имени дзень.