НОВИ САД – Нєшка на новосадским Кею жертвох рациї, на площи опрез памятнїку „Фамелия”, будзе комеморация жертвом Новосадскей рациї, хтору вєдно орґанизую Город Нови Сад, Єврейска општина и Епархия Бачка.
Здогадованє на жертви Новосадскей рациї, кед од 4. по 29. януар 1942. року од мадярских фашистох з руцаньом под ляд до Дунаю страдали даскельо тисячи Серби, Євреє, Роми и припаднїки других националносцох, при памятнїку почнє на 12 годзин дзе, попри пригодних бешедох, будзе служена панахида и комеморативни єврейски обряд.
Делеґациї Городу Нови Сад, амбасадох Израїлу и Мадярскей, Єврейскей општини Нови Сад, Союзу єврейских општинох Сербиї, Матки ромскей и потомкох жертвох Новосадскей рациї положа венци на памятнїк „Фамелия”, а венєц спуща и до Дунаю.
По законченю програми при „Фамелиї”, панахида будзе служена и коло спомин-плочи на Штранду, а за шицки старши особи обезпечени автобус, хтори руши на 13,15 годзин – сообщене на вчерайшей конференциї за медиї у Управи Городу.