НОВИ САД – Нєшка, 2. юния, будзе отримана перша схадзка Скупштини АП Войводини у новим зволаню, а конститутивну схадзку заказал терашнї предсидатель Скупштини Иштван Пастор. Контитутивна схадзка у Велькей сали Скупштини АПВ почнє на 10 годзин.
На основи важацих актох, на першей схадзки маю буц потвердзени мандати покраїнским посланїком, вибрани предсидатель и подпредсидателє Скупштини, меновани ґенерални секретар Скупштини, формовани посланїцки ґрупи, а можу буц формовани и роботни цела Скупштини.
Войводянски парламент ма 120 посланїкох, а найвецей мандати на виберанкох 24. априла достала лїстина Сербскей напредней странки – 63, лїстина Социялистичней партиї Сербиї и Єдинственей Сербиї 12, а коалиция коло Демократскей странки, як и Сербска радикална странка достали по 10 мандати.
Лиґа социялдемократох Войводини у новим зволаню покраїнского парламенту ма 9 посланїкох, лїстина „Досц було-Саша Радулович” 7, Союз войводянских Мадярох 6, Мадярски рух за автономию 2 и єден мандат Желєна странка.