БЕОҐРАД – Понеже схадзка хтора мала буц отримана 24. априла була одказана, предсидатель Влади Републики Сербиї (РС) Александар Вучич, котри источашнє и предсидатель Совиту за национални меншини на уровню держави, за нєшка, 29. април, зволал конститутивну схадзку Совиту за национални меншини.
Нєшкайша конститутивна схадзка будзе отримана на 12 годзин у Влади Сербиї, а после бешеди предсидателя Влади и предсидателя Совиту за национални меншини Александра Вучича, Совит будзе конституовани. Предвидзене же на Совиту будзе бешедовац и представитель Координациї националних совитох, а план активносцох и способ роботи медзи двома схадзками Совиту винєше заменїца предсидателя Совиту за национални меншини, подпредсидателька Влади Кори Удовички.
На конститутивней схадзки Совиту за национални меншини на уровню держави будзе присуствовац и предсидатель Националного совиту Руснацох Славко Рац.
Одлуку о формованю Совиту за национални меншини Влада РС принєсла на схадзки 2. априла, на хторей за членох того цела меновани представителє Влади, предсидателє националних совитох националних меншинох у Сербиї и предсидатель Союзу єврейских општинох Сербиї.