Нєшка Конференция о положеню националних меншинох у АП Войводини

автор зам
772 Опатрене

НОВИ САД – У Скупштини Войводини нєшка на 10 годзин почнє Конференция о положеню националних меншинох у АП Войводини, у контексту Окремного акцийного плану за витворйованє правох националних меншинох.

Як наявене, на Конференциї буду бешедовац подпредсидатель Покраїнскей влади и покраїнски секретар за образованє, предписаня, управу и национални меншини-заєднїци Михль Нїлаш, предсидатель Скупштини Войводини Иштван Пастор, та Лука Бянкони спред Делеґациї Европскей униї (ЕУ) у Сербиї.

О Приступаню Сербиї ґу ЕУ и Поглавю 23 буду бешедовац представитель Мисиї ОЕБС-у у Сербиї и шефица Прегваряцкого тиму за водзенє прегваркох о приступаню Републики Сербиї ґу ЕУ Таня Мищевич.

О Акцийним планє за витворйованє правох националних меншинох на Конференциї буду бешедовац помоцнїк министра правди и шеф Прегваряцкей ґрупи за поглавє 23 у прегваркох з ЕУ Чедомир Брацкович, котри и шеф Роботней ґрупи за виробок Окремного акцийного плану за имплементованє постояцих правних рамикох за защиту националних меншинох, та фахови консултант за виробок Окремного акцийного плану Саша Ґаїн.

О Акцийним планє буду бешедовац и подпредсидателька Скупштини Войводини и предсидателька Координациї националних совитох националних меншинох Сербиї Ана Томанова Маканова, горе спомнути Михаль Нїлаш, як и самостойни фахови сотруднїк у Нїлашовим секретарияту Жолт Сакалаш.

Спред Националного совиту Руснацох на Конференциї будзе присуствовац предсидатель Совиту Славко Рац.

ПОВЯЗАНИ ТЕКСТИ