КОВАЧИЦА – У Ковачици нєшка, 30. новембра пополадню будзе схадзка Координациї националних совитох (НС) националних меншинох у Сербиї, хтору зволал терашнї предшедуюци Координациї др Сулейман Уґлянин, предсидатель НС Бошнякох у Сербиї.
Спред НС Руснацох на схадзки Координациї будзе присуствовац секретар Совиту Таня Арва Планчак, котра потим на штварток и пияток у Ковачици будзе и на дводньовей обуки о правеню програмного и родного буджету у националних совитох.
На нєшкайшей схадзки Координациї ма буц менована Роботна ґрупа за виробок Дїловнїка о роботи Координациї, формоване Роботне цело за провадзенє и витворйованє Акцийного плану за права националних меншинох у Републики Сербиї, порада о вимоги до Влади Сербиї и до Европскей униї за фахову, орґанизацийну и финансийну помоц Координациї у провадзеню витворйованя спомнутого плану, як и звит Роботней ґрупи за вименки Закона о защити правох и шлєбодох националних меншинох.