РУСКИ КЕРЕСТУР – Нєшка po по григориянским календаре, по хторим ше у нашим Апостолским еґзархату ровна парохия у Руским Керестуре, як и грекокатолїцки парохиї у Крижевским владичестве у Горватскей – Вельки пияток, дзень кед Исус Христос умар на крижу.
У керестурскей Катедралней церкви на 8 годзин будзе Утриня з читаньом 12 Євангелийох, а єдна Євангелия ше бере зоз швета Благовищенє, хторе пада на тот дзень.
На 15 годзин будзе Вечурня з покладаньом плащанїци до гробу, хтору вирни годни циловац до соботи вечара. З тей нагоди, парох керестурски о. Михайло Малацко поволує парохиянох же би пришли циловац плащанїцу.
– Кед цилуєме плащанїцу, з тим духовно преглїбюєме Боже милосердиє, чому пошвецени и тот рок. На таки способ ше и ми можеме намагац буц милосердни и у любови – наглашел о. Малацко.
Нєшкайши богослуженя будзе служиц наш апостолски еґзарх, владика Георгий и домашнї священїки. На Вельки пияток и строго пост.
На ютре, на Вельку Соботу, на 8 годзин будзе служена Єрусалимска Утриня пред Христовим гробом, а на 20 годзин Пасхалне бдиниє – Всеночне з Воскресну Утриню.
Як дознава Рутенпрес, на ютре, на дзень пред Вельку ноцу, людзе добрей дзеки до парохийного Каритасу традицийно буду приношиц пасхалнє єдзенє, хторе будзе подароване особом котрим то потребне.