Нєшка на „Коцурскей жатви” штири провадзаци програми

автор тах
781 Опатрене

КОЦУР – У Коцуре нєшка, 10. юлия, почина Фестивал фолклору Руснацох и других националних заєднїцох „Коцурска жатва 2015”, а тирва и на ютре, 11. юлия. Нєшка на програми штири провадзаци програми – Служба Божа, вистава фотоґрафийох, промоция кнїжкох и програма за младих.

Благодарна Служа Божа у Грекокатолїцкей церкви на 18,30 годзин будзе пошвецена 25-рочнїци снованя КУД „Жатва”, а на Служби священїк пошвеци и хлєб з тогорочного жита.

Фестивал шветочно будзе отворени на 20 годзин у Етно-клубу „Одняте од забуца”, дзе будзе вистава фотоґрафийох з прешлих „Коцурских жатвох”, зазначених з фотоапаратом Райка Шолаї.

Познєйше ше публика преселї до двора „Етно-клубу”, дзе будзе отримана промоция кнїжкох у виданю „Руского слова” – „Осце и черешнї” Агнети Папгаргаї, „Слово Бояна Двокраяна” Владимира Бесерминя и „Галов” Ирини Гарди Ковачевич, а орґанизаторе обецую нєзвичайну атмосферу.

На 22 годзин опрез Дому култури почнє друженє за младих „Тамбуранє”, на хторим ше и млади и старши годни опущиц з тамбурову музику „Коцурских бетярох”. Друженє у рамикох Фестивалу орґанизує ґрупа младих КУД „Жатва”.

Програми „Коцурскей жатви” на ютре почню на 17 годзин.

ПОВЯЗАНИ ТЕКСТИ