НОВИ САД – У Заводзе за културу войводянских Руснацох у Новим Садзе нєшка, 15. юния, будзе отримани округли стол з назву „Костельник и ми нєшка”, хтори Завод орґанизує з нагоди 130-рочнїци народзеня др Гавриїла Костельника.
Як поведзене у информациї о орґанизовню округлого столу, з нагоди 130-рочнїци народзеня основоположнїка язика и култури войводянских Руснацох др Гавриїла Костельника требало би вихасновац нагоду за бешеду о уплїву хтори, 68 роки по його шмерци, Костельниково дїло ма на сучасну руску литературу, културу, историоґрафию, наставу руского язика и литератури и на други аспекти живота рускей заєднїци на початку 21. вику.
О спомнутих темох буду бешедовац академик Юлиян Тамаш, проф. др Янко Рамач, Владимир Кирда Болгорвес, Микола Шанта, Микола М. Цап, Михал Рамач и други, модератор Округлого столу Сашо Сабадош, а округли стол почнє на 12 годзин.