РУСКИ КЕРЕСТУР – У Школи „Петро Кузмяк” у Руским Керестуре нєшка на 12 годзин будзе отримана перша схадзка Роботней ґрупи за пририхтованє програмох означованя 200-рочнїци народзеня Петра Кузмяка, хтору ше означує того року.
Означованє 200-рочнїци народзеня першого школованого керестурского учителя, визначного просвитного роботнїка, педаґоґа, писателя и зазберовача народного скарбу, родом зоз Странянох у нєшкайшей Словацкей, чийо мено ноши Школа у Руским Керестуре, єдна улїца у Керестуре, та КУД у Новим Орахове, орґанизує керестурска Школа и Национални совит Руснацох, односно його Одбор за образованє.
Єдна з планованих активносцох будзе и Округли стол з тему „200 роки од народзеня Петра Кузмяка”, а як плановане, на означованю рочнїци буду присуствовац и представителє школох и местох у Словацкей – з Попраду и Старей Любовнї.