НОВИ САД – Нєшка виходза новини „Руске слово”, перши у тим року, и то як двочисло.
Рубрика „Тижньовнїк” понука прегляд найзначнєйших подїйох у 2014. року з рижних обласцох, а рубрика „Нашо места” приноши звити зоз схадзкох скупштинох општинох Кула и Шид, Шветочней схадзки Совиту керестурскей Месней заєднїци и зоз Скупштини Здруженя ремеселнїкох и приватних поднїмательох Керестура.
На „Економиї” визначени напис о Скупштини акционерох „АБЦ Фуд”, а ту зазначени и конєц кампанї преробку цукровей цвикли у червинскей цукровнї.
Рубрика „Духовни живот” на своїх бокох дава информациї о преслави Крачуна по наших местох и Богоявлєня у Керестуре, а ту и тексти о роботох коло церквох у Коцуре. У тей рубрики и вистка о Подзекованю хторе достала шестра Йосафата за служенє Церкви од 1958. року.
Боки „Култури и просвити” информую о Моноґрафиї „Руснаци у Вербаше”, хтора обявена з нагоди Националного швета Руснацох, а медзи иншим, ту и звити з крачунского концерту у Руским Керестуре, музичного вечару хтори бул пошвецени Михалови Лїкарови у Дюрдьове, та з крачунских концертох новосадского Хору „Гармония”.
Рубрика „Людзе, роки, живот” читачом представя Ану Варґову з Керестура, познату по садзеню крачунского житка, док „Спорт” пише о каратистови Мартинови Чизмарови з Вербасу. Визначени и други успишни спортисти, насампредз атлетичаре и каратисти, а на тим боку представени и нови млади фодбалски судийове з Коцура.
Шлїдуюце число новинох „Руске слово” будзе шветочне, з нагоди Дня Руснацох.