СЕРБИЯ – Нєшка ше наполнюю петнац роки од вельких демонстрацийох у Беоґрадзе з хторима закончена власц дотедишнього предсидателя держави Слободана Милошевича, з чим пришло до демократских пременкох у Сербиї.
Демонстрациї почали понеже Милошевич одбил припознац резултати виберанкох за предсидателя СР Югославиї у септембру 2000. року, хтори страцел од кандидата ДОС (Демократска опозиция Сербиї) и тедишнього лидера Демократскей странки Сербиї (ДСС) Воїслава Коштуници.
Вечар 5. октобра гражданом ше з тераси Скупштини Беоґраду обрацел Воїслав Коштуница, як нови предсидатель СРЮ, а 6. октобра Милошевич припознал пораженє на виберанкох.
Як пияток, 2. октобра у Беоґрадзе поведзене на трибини „Пияти октобер – петнац роки познєйше”, 5. октобер важне збуванє, а його вершинска вредносц у тим же Сербию врацел до швета, а терашнї предсидатель Демократскей странки (ДС) Боян Пайтич вчера гварел же преставанє оружийних зраженьох, будованє демократских институцийох, та порушованє безповратного процесу придружованя ґу Европскей униї – найвекши успихи 5. октобра.
На спомнутей трибини, на хторей участвовали социолоґове и дзепоєдни политичаре, оценєте же пременки знєверели обчекованя гражданох и же тота, „скоро нєпобедзуюца пиятооктоберска енерґия” потрошена за 10 роки. Но, як поведзене – пременка ше збула и вона озбильна и нєврацаюца, док Пайтич вчера оценєл же 5. октобер нє досягнул свой циль пре, як гварел – нєдостаток храбросци и одлучносци ношительох пременкох.
Бешедуюци на вчерайшей схадзки Главного одбору Социялдемократскей партиї Сербиї (СДС), предсидатель тей странки Расим Ляїч ше огляднул и на 15-рочнїцу демократских пременкох и гварел же то „нєшка нє популарне у Сербиї, бо 5. октобер и тото цо ше збуло после того дня, знєверело обчекованя гражданох”, алє додал же тото цо теди започате – треба докончиц и будовац жем на фундаментох хтори теди поставени.