РУСКИ КЕРЕСТУР – Нєшка почина дводньова Мултимедиялна манифестация младих „Дньовка”, а у рамикох Културней манифестациї „Костельникова єшень”.
„Дньовка” почнє на 21 годзин у Билей („Дядьовей”) сали Дому култури Руски Керестур з кратшим представяньом младежскей емисиї по руски „Останьце нашмеяни” Радио Нового Саду, з нагоди 10 рокох єй емитованя. Промотерки емисиї буду єй водительки – два Санї – Саня Маркович и Саня Полдруги, як и одвичательна редакторка програми по руски Златица Няради.
Нєшкайша програма будзе предлужена з промоцию компакт-диску „Лєм єден погляд” Златка Русковския, хтори вишол з остатнїм числом часопису МАК. Композициї Златка Русковския буду шпивац Саня Полдруги, Танита Ходак и Анамария Колошняї. Промоция компакт-диску тиж будзе у Билей сали Дому култури.
Отримованє Мултимедиялней манифестациї младих „Дньовка” финансую Завод за културу войводянских Руснацох, Национални совит Руснацох и Месна заєднїца Руски Керестур, а орґанизована є з потримовку Дому култури Руски Керестур, РНТ „Петро Ризнич Дядя” и НВУ „Руске слово”. Главни орґанизатор Манифестациї Здруженє младих „Пакт Рутенорум”.