НОВИ САД – У Новим Садзе нєшка, 4. децембра почина Тринасти Руски фестивал малих сценских формох „Дюра Папгаргаї”, тирва по нєдзелю, 6. децембер, а участвую шейсц театрални представи, шицки з вецей ґлумцами (од два до штири). После шветочного отвераня, нєшка буду виведзени представи „Нинджа у тензиї 2”, Драмскей секциї КУМ з Коцура и „Дакому мац, дакому мачоха”, у продукциї Етно-клубу „Одняте од забуца”, тиж з Коцура.
На ютре на репертоаре представи „Сезона лову на ловара” Драмского студия АРТ Дому култури Руски Керестур и „Як забиц предсидателя” Руского народного театру „Петро Ризнич Дядя, хтору РНТ витворел у копродукциї з вербаскима „Карпатами”.
На нєдзелю, 6. децембра, на Фестивалє буду представи „Атак на идентитет” Драмского студия Шид и „Круцина” Драмского студия Руского културного центру Нови Сад.
Фестивал того року нє змагательни, а як и дотераз, будзе у Театралней сали Ґимназиї „Лаза Костич” и перша представа почина на 19 годзин.
Под час Фестивалу будзе орґанизована вистава з тогорочней Подобовей колониї Етно-клубу „Одняте од забуца” и Месного одбору Рускей матки Коцур.
Фестивал у Календаре репрезентативних манифестацийох Националного совиту Руснацох, а орґанизую го „Матка-Дружтво Руснацох Нового Саду-Войводини” и Городски одбор Рускей матки Нови Сад, з финансийну потримовку Городу Нови Сад, АП Войводина и Националного совиту Руснацох.