РУСКИ КЕРЕСТУР – У Руским Керестуре нєшка почина штиродньова фахово-едукативна роботня, односно семинар за хореоґрафох и танєчнїкох з КУД у наших местох, хтори орґанизує Завод за културу войводянских Руснацох (ВР), а на основи подписаного Спорозуменя о медзиреґионалним сотруднїцтве медзи АП Войводину и Закарпатску обласцу України.
Фахово-едукативну роботню будзе тримац хореоґраф Закарпатского хору з Ужгороду Микола Мовнар, а як наявене, помагац му буду нашо хореоґрафе – Йоаким Рац Мими з Керестура и Звонко Костелник з Горватскей и корепетитор Юлиян Рамач Чамо, з Керестура.
Завод за културу ВР на семинар поволал по єдного хореоґрафа и по єдну танєчну пару з КУД „Жатва” з Коцура, КПД „Карпати” з Вербасу, Руского културного центру Нови Сад, КУД „Тарас Шевченко” з Дюрдьова, КПД „Дюра Киш” зоз Шиду, КПД „Иван Котляревски” з Бикичу и керестурского Дому култури.
Фахово-едукативна роботня нєшка почина на 9 годзин, преподаваня кажди дзень буду у просторийох Дому култури од 9 до 13 и од 15 до 19 годзин, а закончуюца часц будзе на пияток, 12. юния од 15 до 17 годзин.
Завод тоти фахово теорийни и практични преподаваня з обласци фолклору орґанизує у сотруднїцтве з Националним совитом Руснацох и Школу „Петро Кузмяк”, у чиїм интернату буду змесцени учашнїки на семинаре.