РУСКИ КЕРЕСТУР – Нєшка, 1. октобра, у Руским Керестуре почина 55. Фестивал рускей култури „Червена ружа“. Фестивал перши раз будзе отримана у Спортскей гали, а почнє на 16 годзин з отвераньом вистави подобових роботох авторки Андєлки Античевич з Беркасова, у голу Спортскей гали.
Нєшка на 16,30 годзин будзе музично-танєчна манифестация дзецох „Червене пупче“, а потим на 20 годзин обновена манифестация Фестивалу „Одгуки ровнїни“, на хторей участвую скоро шицки музично-фолклорни ансамбли з наших местох.
На ютре, 2. октобра на 17 годзин будзе менифестация „Червена ружа” – традицийне змаганє наших младих шпивачох за кошарку червених ружох и чобольов, а у ревиялней часци буду виведзени забавни композициї з компакт-диску „Лєм єден погляд“ Златка Русковския.
Тогорочни Фестивал на нєдзелю будзе закончени зоз Шветочним концертом, хтори почнє на 20 годзин, а наступя нашо ансамбли з найквалитетнєйшима точками. Музично-танєчни секциї керестурского Дому култури пририхтали и одредзене сценске подзекованє свойому фаховому руководительови Юлиянови Рамачови Чамови, а як госц „Ружи” на Шветочним концерту наступи ансамбл КУД „Святи Сава” зоз Шиду.