НОВИ САД – Медзинародни польопривредни саям од нєшка, та по пияток, 20. мая, позбера коло 1 500 викладачох зоз 60 державох, та найзначнєйших привреднїкох, односно польопривреднїкох зоз Сербиї. Як наявели орґанизаторе, манифестацию на Новосадским сайме нєшка отвори предсидатель Сербиї Томислав Николич.
Того року держава-партнер Сайму Италия, та з тей нагоди буду представени 16 италиянски польопривредни подприємства. У рамикох Сайму будзе орґанизована фахова конференция Италия – Сербия, з темами о аґробизнису, овоцарстве, орґанскей продукциї. Заплановани и курси за студентох о италиянскей ґастрономиї и представянє италиянских винох. На Сайме буду отримани и културни змисти.
Вистава польопривредней механїзациї забере 50 одсто простору за викладанє, дзе годно видзиц аж 1 500 машини.
Цени уходнїцох исти як влонї: поєдинєчна кошта 500 динари, а за колективни нащиви 350 динари. На ютре будзе „фамелийни дзень”, та цала фамелия годна нащивиц Саям за 500 динари. Роботни час Сайму од 9 до 19 годзин.