РУСКИ КЕРЕСТУР – У Руским Керестуре нєшка, 20. фебруара, премиєрно будзе виведзена представа „Цо видзела послуга” Джона Ортона у режиї Владимира Надя Ачима, Руского народного театру (РНТ) „Петро Ризнич Дядя”. Слово о комедиї, анґлийским гумору, хтори присподобени нашому менталитету.
– То сатира, оштра критика либералного капитализму, дзе присутни морални девияциї и деформациї у висших пасмох дружтва, як цо то инцест, кариєризем, дзе ше швету „замасцує” очи з протоколарнима формалносцами. Вишмеяни и бирократизем и банални обрядни бонтон, док шор вредносцох остава на варварских, аж анималних поривох – гварел пред премиєру режисер Надь.
У представи бавя шесцеро, нашей публики уж добре познати ґлумци – Славко Орос, Снежана Малацко, Ребека Планчак, Михайло Варґа, Емил Няради и Ненад Канюх.
Премиєра представи нашого националного театру будзе у Велькей сали Дому култури на 19,30 годзин, а тот 25. проєкт РНТ витворени з финансийну потримовку снователя Театру – Националного совиту Руснацох.