НОВИ САД – У специялним виданю „Руского слова”, хторе нєшка сцигнє читачом, попри узвичаєних рубрикох новини понукаю и даскельо нови теми. То насампредз о економиї, о хторей „Руске” бешедовало з Делеґацию Европскей униї у Беоґрадзе и економским аналитичаром и одвичательним редактором часопису „НИН” Миланом Чулибрком, а ту и написи о поднїмательови з Бикичу и успишних локалних самоуправох.
Рубрика „Тижньовнїк” пише о схадзки Националного совиту Руснацох, о терашнєй ситуациї пред позарядову Скупштину акционерох „АБЦ Фуд” у Руским Керестуре, док ше рубрика „Нашо места” занїма зоз звекшанима порциями за дзепоєдни винїци у Шидзе. Ту мож пречитац и о активносцох керестурских школярох и актуалносцох з општини Шид, та о Округлим столє о насилстве у фамелиї у Вербаше.
На боку ”Економия” представени познати аґроном-овоцар Дюра Надь з Кули, а „Култура и просвита” понука розгварку з Ирину Гарди Ковачевич з нагоди седемдзешат рокох єй народзеня. Ту и текст о инклузивним образованю у дюрдьовскей и керестурскей школи, а медзи иншим, „Руске” пише и о Владови Нярадийови, чийо ґрафики позберани до скарбу Матици сербскей.
„Духовни живот” на своїх бокох зазначел же сцигнул Вифлеємски огень до Коцура, а звекшого пише о преславйованю Миколая по наших парохийох и Крачуна у Руским Керестуре.
„Мозаїк” приноши атмосферу з интересантного збуваня з назву „Жива библиотека” у Новим Садзе, на хторим участвовали и нашо млади. „Спорт” пише о успиху наших фодбалских клубох на концу єшеньскей часци першенства, а у тим специялним виданю як додаток вишла „Дикица”, хтора читачом понука руски гумор на свой окремни способ.
Тото специялне виданє „Руского слова” безплатне, а пре швета, шлїдуюце число „Руского слова”, перше у идуцим року, видзе 9. януара.