РУСКИ КЕРЕСТУР – У Руским Керестуре нєшка на 10 г. у просторийох Дому култури будзе отримана шеста порядна схадзка Националного совиту (НС) Руснацох у тим зволаню. НС перше констатує мандат свойому новому членови з лїстини „Млади за будучносц” Борисови Фейдийови, а потим плановане приношенє Плану роботи и Финансийного плану НС за 2016. рок.
На дньовим шоре и даванє думаня о вименки Финансийного плану Заводу за културу войводянских Руснацох (ВР) за тот рок, та думаня о Програми роботи и Финансийним планє Заводу за наступни рок. Тиж так, НС би нєшка мал дац и согласносц на План роботи и Финансийни план НВУ „Руске слово” за 2016. рок, як и принєсц Одлуку о вименки Одлуки о снованю НВУ „Руске слово”.
Як соснователь и снователь, НС нєшка перше розриши, а потим и менує нових членох до Управного (УО) и Надпатраюцого одбору (НО) Заводу за културу ВР, як и до УО и НО Руского народного театру „Петро Ризнич Дядя”, а на основи думаня свойого Одбору за културу. Тиж так, будзе меновани и член до УО НВУ „Руске слово” з представительох занятих.
Точки дньового шору и починанє явней розправи о додзельованю припознаньох визначним Руснацом за їх доприношенє рускому народу, як и починанє поступку за доставанє радио-фреквенциї за информованє по руски на локалним уровню, та потвердзованє вецей одлукох принєшених на ВО НС.