НОВИ САД – Гоч за остатнї роки у Сербиї запровадзени значни реформи з обласци правох дзецка у напряме обезпечованя образовней, здравственей и социялней защити, указало ше же применьованє тих правох углавним нєдошлїдне, нєдостаточне и нєодвитуюце – гвари ше у сообщеню Покраїнского омбудсмана з нагоди нєшкайшого Шветового дня дзецка.
Найновше виглєдованє о витворйованю права дзецка и школяра на особного провадзача, хторе окончел Покраїнски омбудсман, указало же воно нє цалком законски реґуловане.
Шлїдом того, Покраїнски омбудсман у сообщеню обраца увагу же Министерство просвити, науки и технолоґийного розвою формовало Ґрупу за социялну инклузию, чий приоритет будзе робота на вименкох Правилнїку о додатней образовней, здравственей и социялней потримовки дзецом и школяром, а ма виробиц и Правилнїк о педаґоґийней асистенциї.
Шветови дзень дзецка ше означує од 1989. року, кеди Ґенерална скупштина Зєдинєних нацийох прилапела Конвенцию о правох дзецка, цо бул и перши медзинародни документ з обласци людских правох хтори ше окреме занїма з правами дзецка.