ШИД ‒ На подручу општини Шид нє грожи опасносц од вилївох, гоч ше позавчером звекшал уровень Сави при Ямени и виношел 620 центиметри, алє потим пришло до стаґнациї ‒ гварел вчера на схадзки Општинскей ради Никола Васич, предсидатель Општинскей ради и општинского Штабу за позарядово ситуациї.
Општинска рада прилапела вчера Оперативни план охрани од вилївох за 2016. рок у хторим наведзени загрожени подруча, Фахово‒оперативни тим, план активносцох явних подприємствох, меновани капацитети за змесценє жительох у случаю потреби и подобни мири.
Васич наглашел же обезпечени и мехи и найлонова фолия, а по потреби будзе и писок. Хвильково на Сави при Ямени порядна охрана од вилївох, а кед же будзе требац, будзе преглашена и позарядова охрана, о чим явносц будзе обвисцена.