ШИД/БЕРКАСОВО – До Шиду и надалєй дньово приходза по осем автобуси з вибеженцами, одкаль предлужую драгу до центру за вибеженцох у Опатовцу, у Горватскей. През шидску општину дотераз прешли 170 000 вибеженци, а як гварела портпаролка Аґенциї за вибеженцох Зєдинєних нацийох Мелита Шунїч, число вибеженцох ше нє зменшує.
По словох началнїка Сримского управного округу Илиї Милиновича, шицко идзе як плановане, медзитим, кед Горватска подзвигнє ограду, як наявене, тей локалней самоуправи будзе потребна помоц. Милинович гварел же ше адаптує простор за змесценє коло 1 500 особох.
Як вчера преношели медиї, на гранїци з Горватску коло Беркасова було од 2 000 до 3 000 вибеженцох, дзепоєдни пренєсли же их було и до 7 000, котри чекаю же би вошли до Горватскей.