НОВИ САД – После вчерайшей позарядовей схадзки, Покраїнски социялно-економски совит (ПСЕС) пред явну розправу о Нарису закона о системи плацох занятих у явним секторе поручел же таки важни документ нє шме буц принєшени без социялного диялоґу.
Члени ПСЕС завжали заєднїцке становиско о тим нарису и принєсли заключеня хтори на явней розправи буду заступац представителє Синдикату „Нєзависносц”, Союзу самостойних синдикатох Войводини и Уния роботодавательох Войводини.
Подпредсидатель Покраїнскей влади и покраїнски секретар за привреду, обезпечованє роботи и ровноправносц полох Мирослав Васин гварел же без согласносци шицких релевантних факторох и социялних партнерох нє мож приношиц закони чий змист директно уплївує на материялни и социялни стан людзох.
Асоцияция шлєбодних и нєзависних синдикатох (АСНС) вчера вимагала поцагованє Нарису закона о системи плацох у явним секторе, бо ше з нїм занятих кладзе до нєровноправного положеня, а нє одноши ше на явни подприємства и функционерох.
– Предложени законски ришеня нєуставни и дискриминаторски, запровадзує ше занятих першого и другого шору, а платни катеґориї место праведносци принєшу гаос – спозорел АСНС.
По оцени того синдикату, кед предложени ришеня буду прилапени, буду утаргнути колективни контракти.