Обезпечиц роботу за Руснацох у локалних самоуправох

автор сен
1.1k Опатрене

РУСКИ КЕРЕСТУР – На всоботу, 29. авґуста отриманей схадзки Одбору за службене хаснованє язика и писма и представительох подручних канцеларийох Националного совиту (НС) Руснацох, констатоване же у тей обласци найвекши проблеми настава у процесу обезпечованя роботи на основи припадносци националней меншини. Понеже предсидатель Одбору Зоран Бережни бул оправдано одсутни, зоз схадзку предшедавал предсидатель Вивершного одбору НС Желько Ковач.

Присутни анализовали звит о стану у местох дзе жию Руснаци, хтори достати на обиходзеню подручних канцеларийох НС, после чого розпатране дзе треба интервеновац и на яки способ помогнуц Руснацом у проблемох з обласци службеного хаснованя язика и писма.

На схадзки заключене же треба реаґовац на надписи (табли) нєправилно написани, лєбо анї нє виписани по руски на державних институцийох и явних подприємствох, на уходох до населєних местох, з назвами улїцох и подобним, у локалних самоуправох дзе руски язик службени.

4-Sluzbene-02

Конкретно, на уходзе до Вербасу назва места виписана лєм по сербски, у Новим Садзе нєправилно написана назва явного новтаруша, у Кули гришка обачена на табли суду, на цо Одбор будзе реаґовац з дописами одвичательним особом. На заєднїцкей схадзки после роботи по одборох, Желько Ковач поволал шицких припаднїкох нашей меншини же кед обача, лєбо маю спознаня о даяких гришкох и нєправилносцох на таблох, най о тим явя до НС.

Бешедоване и о потреби нащиви локалним самоуправом у хторих руски язик службени и з чолнима людзми бешедовац о проблемох з прекладателями, о нєдостаточним проценту Руснацох занятих у явних институцийох и другим цо у складзе зоз законскима предписанями.

Винєшени и проблем же у Скупштини Автономней покраїни Войводини були заняти тройо прекладателє за руски язик, а после пензионованя єдного, на його роботне место нє прията нова особа. Ґу тому, треба ше презнац чи Руснаци маю право на прекладателя и у Скупштини Городу Нови Сад.

4-Sluzbene-03

ПОВЯЗАНИ ТЕКСТИ