КОЦУР – У дворе коцурского Мото клуба „Пеґасус”, всоботу 1. юния, отримана нова едукация о унапредзованю безпечносци на шицких драгох котра орґанизована у сотруднїцтве Аґенциї за безпечносц транспорту Републики Сербиї, Совиту за безпечносц транспорту општини Вербас и Полицийскей станїци Вербас.
Зоз членами того клубу ше бешедовало о правилним хаснованю моторкох, правилним реаґованю у кризних ситуацийох у цеку воженя, мирох защити од покалїченьох, як и на котри способ помогнуц покалїченим особом, а облапени и числени други теми.
– Одлучели зме же того року отримаме едукацию у Коцуре, прето же ту уж длуго, а добре функционує Мото клуб „Пеґасус” зоз своїма численима членами. Отримане обучованє и едукация, а даєдни моторкаше достали од Совиту за безпечносц у транспорту и защитну опрему, без котрей нєт безпечного воженя. А компаниї „Тутнєвич АНҐ” дзекуєме же нам тоту опрему и обезпечела – гварела Миляна Штулич, предсидателька Совиту за безпечносц у транспорту општини Вербас.
Акцию у Коцуре потримал и предсидатель Општини Вербас Милан Ґлушац, а присуствовали и моторкаше зоз числених мото клубох зоз Горватскей, Босни и Герцеґовини, Словениї, Австриї и других державох.