НОВИ САД – Завод за културу войводянских Руснацох (ВР) нєшка обявел Явну поволанку за виглєдованє, чуванє и унапредзованє музично-фолклорней и хорскей творчосци, на хтору можу конкуровац реґистровани правни особи – КУД и КПД Руснацох зоз шедзиском у Войводини, чия дїялносц заснована на чуваню и пестованю националного и културного идентитету.
Явна поволанка-конкурс тирва од нєшка, 24. юния, по 8. юлий, а у цалосци є обявена на веб-сайту Заводу www.zavod.rs, на веб-сайту „Руского слова” и „Рутенпресу” www.ruskeslovo.com (на правим боку), як и у новинох „Руске слово”.
Вєдно з поволанку и условиями обявени и формулар на хтори ше пише и подноши прияву, а єдно з условийох же прияви муша буц придати на тим формуларе. У процивним – нє буду розпатрани.
Мож конкуровац за софинансованє проєктох и орґанизованє манифестацийох, а окреме за чуванє и пестованє народних обичайох, защиту, унапредзенє и презентацию фолклорного нашлїдства, защиту, унапредзенє и презентацию хорского нашлїдства, защиту, унапредзенє и презентацию музичного нашлїдства и з другима програмами.
Прияви и виоплнєти формулар мож особнє придац до Заводу за културу ВР (Футожска 2/3, Нови Сад), послац по електронскей пошти на е-адресу: zavod.rusini@gmail.com лєбо послац по порядней пошти на адресу: Явна поволанка, Завод за културу войводянских Руснацох, Футожска 2/3, 21 000 Нови Сад.