ВЕРБАС – На главней городскей депониї у Вербаше пияток, 8. юлия вибухнул огень хтори локализовани, а город прекрил густи, нєздрави дим, пише РТВ и портал Општини Вербас.
Директор ЯКП „Комуналєц” з Вербасу Радомир Чурович гварел же депония почала гориц коло 14 годзин и же огньогасна служба Вербасу такой пререзала огень и положела го под контролу и же квартельни обєкти нє були у опасносци. О огню поинформовани и компетентни у Новим Садзе.
Над Вербасом бул густи дим з нєприємним пахом, а обчекує ше же огень помали будзе гориц и тлєц ище даскельо днї, та воздух будзе подлєйши, гварел Чурович.
Компететнтни городски служби дежурали през дзень и вноци на депониї, же би ше огень нє преширел.
