ВАРШАВА (ПОЛЬСКА) – З нагоди 10-рочнїци першого зашеданя Заєднїцкей комисиї Влади и националних меншинох, у просторийох Канцелариї предсидателя Ради министрох Польскей Републики (влади), 22. септембра отримана Шветочна схадзка спомнутей комисиї. Перша схадзка Заєднїцкей комисиї Влади и националних меншинох Польскей отримана 21. септембра 2005. року, як резултат предписаньох Закона о националних и етнїчних меншинох и реґионалних язикох.
Шветочносц отворел началнїк Департману националних и етнїчних меншинох Добєслав Жемєнєвски, а з тей нагоди вецей представительом националних меншинох уручени державни одликованя за очуванє и розвиток културного идентитету националних и етнїчних меншинох, з котрима их одликовал предсидатель Польскей Републики Анджей Дуда.
Медзи двоїма добитнїками високого одликованя – Златного крижу за заслуги – и Ярослав Трохановски з лемковскей националней меншини, док шицки бувши и терашнї члени Заєднїцкей комисиї Влади и националних меншинох од министра Анджея Галїцкия достали Почесни грамоти за доприношенє дїялносци Комисиї. Медзи добитнїками Грамоти и др габ. Олена Дуц-Файфер (котра лемковску етнїчну меншину у Комисиї представяла од 2005. по 2014. рок), та актуални члени др Мирослава Копистянска и проф. Штефан Дудра.
Исти дзень, 25. септембра того року, польски Сейм (парламент) принєсол вименки Закона о националних и етнїчних меншинох, прилапеного пред 10 роками, а пременки ше, медзи иншим, одноша и на преширенє можлївосци хаснованя язикох националних и етнїчних меншинох и реґионалного язика як помоцних у контактох з локалнима самоуправами, а тиж и у контактох зоз самоуправну администрацию срезкого ранґу.
Тиж так, Закон тераз дава можлївосц же би ше, на вимогу заинтересованих, у општинох и срезох видавало двоязични потвердзеня, же би ше ґу орґанизацийом националних и етнїчних меншинох самоуправи обрацали з двоязичнима писмами (на службеним и меншинским язику) и обявйовали информациї у двоязичней верзиї.
Уведзени пременки злєпшую и дїялносц Заєднїцкей комисиї Влади и националних и етнїчних меншинох пре становиско Комисиї о представнїкови окремного министра за питаня висшого школства, а пременки министрови за вирски питаня и национални и етнїчни меншини даваю можлївосц дофинансованя едукациї одроснутих особох (до тераз то було лєм за дзеци и младеж). Кед буду розправяц о питаньох вязаних за меншини, самоуправи на схадзки годни поволовац и ополномоцнєнїкох за питаня националних и етнїчних меншинох.