КУЛА – На вчерайшей схадзки Скупштини општини (СО) Кула, попри Одлуки о Дню општини, хтора виволала и єдину векшу дискусиї, прилапена и Одлука о утвердзованю и означованю назвох населєних местох, улїцох и площох и способе утвердзованя хижних числох и означованя будинкох з числами на териториї општини Кула.
Одборнїки прилапели и Одлуку о утвердзованю доприносох за ушоренє будовательней жеми, у хторей, як потолковане, дотерашнє „надоплнєнє” постава „допринос” и утвердзує хто шицко ошлєбодзени од його плаценя. У одношеню на законску реґулативу, а у складзе зоз законом, тоти ошлєбодзеня и преширени и коефициєнти вецейраз зменшани, же би ше цо мєней терховало гражданох кулскей општини, гварене у толкованю Одлуки.
СО Кула вчера прилапела вименки и дополнєня статутох ЯКП и ЯП хторим є снователь, медзи нїма и ЯКП „Руском” з Керестура, як и Народней библиотеки Кула. Слово о процедуралних вименкох, дзе тераз у статутох ЯКП начишлєни и од Општини зверени роботи тим подприємством, док у Статуту Народней библиотеки пременєна адреса шедзиска, понеже є тераз у Доме пионирох.
На схадзки прилапени звити и плани роботи Штабу за позарядово ситуациї Општини, Орґанизациї Червеного крижу, Дому здравя, Центру за социялну роботу и Дому за старих, за часци хтори ше одноша на їх финансованє з општинского буджету.
Дата согласносц на хаснованє мена Општини у назви „Союз спортох Општини Кула”, хтори би мал буц основани 15. фебруара, а на вимогу городоначалнїка Зомбора, хтора попри кулскей, послата и скупштином општинох Оджак и Апатин, дата согласносц на инициятиву за снованє Интеґрованого универзитету у Зомборе, цо потим будзе прешлїдзене до Покраїнского секретарияту за образованє.
Пре задзекованє члена Општинскей ради (ОР) Кула Марка Пешича з Червинки, котри у Ради бул задлужени за дружтвени дїялносци, СО Кула з тайним гласаньом за члена ОР вибрала Тияну Йованович, физиотерапеутку з Червинки.
На вчерайшей схадзки присуствовали лєм штирме одборнїки з опозициї, а у одношеню на обсяжни дньови шор, схадзка швидко закончена, за коло 2 годзини.