Одлука Скупштини општини по закону

автор сен
878 Опатрене

ВЕРБАС – После критикох коалициї новинарских и медийних здруженьох на одлуку же би ше до дїялносци Явного комуналного подприємства (ЯКП) „Стандард“ уведло и информованє, та на преволованя же ше на нови роботни места по партийней линиї анґажує бувших роботнїкох Явного подприємства (ЯП) за информованє „Вербас“, Општина Вербас видала сообщенє у хторим твердзи же ше шицко кончело по закону.

У сообщеню ше наводзи же чолнїки локалней самоуправи длуго робели на пробованю зачувац ЯП „Вербас“, мали схадзки з представителями Покраїнского секретарияту за културу и явне информованє, та представителями Министерства култури и информованя, медзитим нє дошло ше до ришеня. З Аґенциї за приватизацию явене же за подприємство нє будзе розписана явна поволанка, прето же длуство векше од капиталу, та одлучене же часц роботнїкох прейдзе до ЯКП „Стандард“, понеже воно муши мац свою службу за одношеня з явносцу. Як сообщене, заняти у тим подприємстве буду робиц як служба за одношеня з явносцу за шицки явни подприємства у Вербаше.

Општина потвердзела же ше нє будзе емитовац радийна и телевизийна програма, а после гашеня Подприємства за информованє „Вербас“, воно автоматски траци дозволу за емитованє, так же ту нєт слова о потупйованю закона. Општина поручела же критериюми за преход роботнїкох з єдного до другого подприємства були фаховосц и професионална пошвеценосц роботи, а нє припадносц даєдней странки.

– Руководство Општини Вербас мал онамиру же би часц занятих котри ше нє вияшнєли за социялну програму були розподзелєни до ЯКП „Стандард“ и же би зоз свою роботу и закладаньом допринєсли його лєпшому функционованю. Можлїве же би дзепоєдни були задовольни кед би шицки заняти у ЯП за информованє „Вербас“ остали без роботи у хвильки кед важи Уредба о забрани нового приїманя на роботу. Поставя ше питанє прецо здруженя новинарох нє реаґовали кед знали же ше загаша медиї чий снователь локална самоуправа? Напроцив, перши потримали приношенє тих законох – поручене з Општини Вербас.

ПОВЯЗАНИ ТЕКСТИ