Одмалючка вязани за музику

автор С. Надь
1.3k Опатрене

Уж даскельо мешаци Керестурци ше цеша же їх валалчан медзи вибранима младима шпивачами хтори ше змагаю у популарней телевизийней емисиї „Пинково гвиздочки”. Себастиян ма 15 роки, а дотераз ше музика вше преплєтала през його живот.

Як гвари, одмалючка люби шпивац. Накадзи рано станул пошпивовал даяку писню, та мац франтовала же єдного дня будзе шпивач. Музично ше почал образовац у трецей класи, кед почал ходзиц до музичней школи на годзини клавира. У дзецинстве наступал на „Червеним пупчу”, а гвари же би любел шпивац и на нашим найвекшим и найстаршим фестивалу култури „Червена ружа”.

– Любим шпивац и сцем наступац, гоч ше на „Ружи” нє шпива шпиванки хтори приватно слухам и у хторих ше пренаходзим. Заш лєм, думам же наисце маме красни руски шпиванки и же треба пестовац нашу окремносц. Пренаходзим ше у соулу и попу, а найволїм шпивац анґлийски шпиванки прето же су рижнороднєйши, музика иншака и мнє вони, вообще, пасираю – толкує Себастиян.

Прешлого року треци раз наступел на мултимедиялней манифестациї младих „Дньовка”, а гвари же ше за тоту манифестацию вязал пре концепт програми и публику хтора го барз добре прилапює.

Окрем наступох у емисиї „Пинково гвиздочки”, Себастиян свойо шпиванє того року почал усовершовац и так же почал шпивац у Мишаним хору Дома култури Руски Керестур.

12140579_1237994219551206_7247887880772997503_n

ВАЛАЛСКА ПИХА

– Пред тим як сом ше приявел за участвованє, нє провадзел сом „Пинково гвиздочки”, та сом нє знал яку файту музики будзем шпивац. Думал сом же то вироятно буду даяки забавни сербски шпиванки, алє мило ми було кед сом дознал же, у ствари, векшина учашнїкох шпива анґлийски шпиванки. Углавним сам вежбам – слухам яки зауваги ма жири на мнє и на других, и пробуєм тото виправиц, а у вибераню шпиванкох ше консултуєм зоз нашим школованим музичаром Мирком Преґуном – гвари Себастиян.

Од кеди ше почал зявйовац у популарней емисиї змагательного характеру „Пинково гвиздочки”, постал атракция у своїм валалє и причина прецо велї пияток вечар шедаю патриц ТВ „Пинк” („Руске слово” нє потримує шицки вредносци хтори промовує ТВ „Пинк” – Ред.).  Гоч людзох интересує зоз першей руки чуц деталї о емисиї, Себастиян гвари же змагательом нє допущене бешедовац о резултатох, покля ше емисия нє закончи.

– Случує ше ми же пойдзем до дутяну и нє можем лєм дойсц дому, бо кажде сце зо мну поприповедац. Людзох найбаржей интересує кеди будзем наступац, випитую ше од кеди ше занїмам з музику и подобне. Нє гварим же ми то барз завадза, алє дзепоєдни людзе ше знаю барз надрильовац, та подумам же ми лєпше скорей кед сом лєм поздравкал людзом и нє чувствовал обовязку ставац ґу каждому – приповеда наш собешеднїк.

ШПИВАНЄ ЛЄМ ГОБИ

Гоч є вязани за музику, Себастиян вше мал иншаки интересованя и нє видзи ше у музичней индустриї.

– Думам же сом скромна особа, любим упознавац людзох, дружиц ше. Кед мам шлєбодного часу патрим филми и сериї науково-фантастичного жанру. Кед сом бул мали сцел сом буц форензичар, понеже сом патрел таки сериї и емисиї, а тераз сом заинтересовани за криминалистику. Волєл бим кед би ми музика була лєм гоби, а нє сновац музичну кариєру. Но, то нє значи же ше нє предлужим занїмац зоз музику кед ми добре руши – гвари Себастиян.

Себастиян єден з младших сотруднїкох младежского часопису „Мак”, а однєдавна почал писац поезию. Єдна писня му обявена у „Руским слове”, а свойо твори презентовал и на литературних вечарох у Коцуре. Себастиян ходзи до осмей класи основней школи „Петро Кузмяк” у Руским Керестуре, а планує остац у керестурскей ґимназиї.

IMG_3605

ПОВЯЗАНИ ТЕКСТИ